場內集合保齡球、溜冰場、卡丁車、碰碰車、彈床、飛索、籃球場、射擊遊戲、射箭、桌球等，超過50+遊戲項目。
佔地有成1萬平方呎，想玩齊晒所有項目，真係要一早就嚟玩啦~
門票設有2.5小時體驗、全日票亦有。
我哋就選擇咗全日任玩門票，帶上手帶就可以全日自由進出遊樂場。
完成購票，進場前需要先處理保險問題。
用WeChat掃碼，輸入資料需要入場者姓名、電話、證件號碼、出生日期等資料。
入場後，馬上掃碼免費使用儲物櫃，將個人隨身物品都鎖於櫃中。亦可以中途提取物件，所以我哋嘅所有物品，包括小朋友水樽都鎖於櫃入面，需要就過嚟開櫃拿取。
另外，場內部份遊戲都需要穿著防滑襪才可以體驗。
如果冇防滑襪都可以於場內購買，每對RMB 10。
溜冰場
呢到係真雪嘅溜冰場，入場費已包齊溜冰鞋、保護裝備。小朋友需要配戴頭盔，另外小朋友鞋碼最細係28碼，所以較年幼小朋友就未能體驗呢個遊戲項目了。
如果需要輔助工具，可向職員查詢，每次租用費為RMB20。
保齡球
進入保齡球區前，需要到前台向職員取專用鞋。而保齡球區沒有小朋友鞋，所以只需要除鞋，並穿著防滑襪就可以進場體驗。
區內亦有提供兒童用的輔助工具，進行遊戲。
卡丁車
絕對係必玩項目呀!! 而場地都非常窩心，大人跟小朋友係分開進行遊戲。
都非常有速度感，好好玩呀!
^第一次玩卡丁車嘅我，原來都真係好好玩! 好緊張呀我!!
碰碰車
都係必玩項目，經常都大排長龍呀!!
高空滑軌，見到都覺得好刺激! 但係體驗者需要有1.4米身高先可以玩。
翹曲滑正，呢個設施真係超刺激!! 夠膽真係要試一試呀~
仲有需要團隊合作嘅遊戲「Counter Strike」，入面係一個夜光迷宮，喺出面睇住和牛B、朋友及爸爸一齊玩，都睇到好緊張呀!! 而每節遊戲時間為10分鐘。
妹妹最鍾意玩嘅就係彈床區，超級放電，同埋好適合細嘅小朋友玩。
另外仲有一個小型迷宮陣，入面有個細細波波池。
兒童版嘅飛索，都係好受歡迎嘅遊戲。
訓練平衡力嘅獨木橋，又係好好玩!!
仲有鞦韆，水管滑梯。
投籃遊戲，適合一大班人進行遊戲體驗。
隊制遊戲項目，超級放電呀!!
籃球場
呢到嘅體育活動都算多，仲有桌球。
如果玩到出晒汗想玩靜態遊戲，呢到仲有電子遊戲體驗區。
場內有洗手間，如果唔想離場，遊樂場入面亦有輕食餐吧。
收費:
地圖:
前往方法:
搭乘深圳地鐵10號線前往木古站B出口步行約15分鐘/ 華南城站C出口步行約10分鐘。
【龍崗萬達廣場Party Day】
地址: 深圳市龍崗區平湖街道華南二道萬達廣場6F-A舖
營業時間: 10am. – 11pm.
