較早前我哋又北上尋歡，拖咗一段時間，終於有時間分享一下。呢到係一個超大嘅免費入場兒童公園！入面有幾個超大型戶外兒童遊樂設施超級放電、19款大型機動遊戲(付費)！呢度係超級超級適合親子、放電！
閱讀更多：
👉🏻【北上親子遊】超放電室內運動遊樂場 | 168元起體驗50+遊戲項目
呢個係深圳最大嘅兒童公園「龍崗兒童公園」，「龍崗兒童公園」於今年年頭開幕，全園佔地344萬平方呎，園內分為機動遊戲區、無動力遊玩區、商業休閒區3大區域，共有19款機動遊戲設備和10個無動力主題遊戲設備，一共有29項遊戲設備，當中包括亞洲最大海盜船、大灣區海拔最高的摩天輪、首創兒童四維動感劇場等，重點係免費入場，所以假日嘅時候，呢到亦係當地人溜娃嘅絕佳之選！
呢到嘅機動遊戲(付費)有部份都好似AIA嘅遊戲咁，但唔同之處係更多元化，有大型免費兒童遊樂設施。玩嘅機動遊戲有適合幼兒、兒童、青少年及大人，可以話有唔同程度嘅刺激遊戲俾不同玩家遊玩。
即使付費都好，其實都抵玩！下面會再詳細分享購買資料。
我哋當日大概中午嚟到，人流已經好多。每樣都需要排隊，免費嘅兒童遊樂設施區都好多人。而最特別、最值得玩嘅設施《森林飛車》，可乘坐車仔喺半空中繞園一圈、車仔仲可以360°旋轉，睇晒成個公園嘅風景，佢係最受歡迎嘅項目之一！所以輪候時間太長，我哋呢次都放棄咗，唯有下次再嚟玩過。
呢到真在太大，機動遊戲都真係多，有碰碰車、電動車、兒童版洗衣機、國內兒童版滑浪飛船、飛天鞦韆、海盜船等等。
^ 大灣區海拔最高的摩天輪
^ 公園景色，以及其中兩個免費嘅兒童遊樂設施
當日亦都玩唔晒入面嘅設施同遊樂設施，包括兒童四維動感劇場我哋都未參觀到！！
嚟到呢度玩絕對會逗留一天，大家都可以放心嘅。呢度都有餐廳、小食，可以醫肚休息。
如果怕小朋友無力行，又冇帶BB車，場內亦有共享童車可以租用。
講返付費遊戲嘅資料，國內好興用會員制，《深圳龍崗兒童公園》入面嘅機動遊戲收費都係設非會員及會員價。但價錢都相差都多，大概相差RMB 20/次/人。所以我都建議大家如果會玩機動遊戲，都係去充值玩會抵玩好多。
愛森牧場 – 乘坐牧場車圍繞牧場一圈進行嘅雷射槍射擊遊戲，可以一家人鬥高分！
水滴漂流 – 我覺得係兒童版滑浪飛船，真係好好玩！不過預咗會整濕，我哋足足玩咗2次！
歡樂水滴 – 搭乘小車圍圈轉動，用水槍向中間的人物射水。
關於付費遊戲會員充值，會員充值方案有3個，當然都係愈買得多一定愈抵，但我建議大家先睇睇佢哋嘅遊戲列表，再篩選有冇邊啲遊戲會玩，再計返條數去買。又或者會計劃2年內都會再嚟幾次或一大班人share一個戶口的話，買最貴RMB1,580就係最抵玩，但我哋當日買最平嘅RMB338仲有少少餘額用剩。不過大家都需要注意嘅係，有部分遊戲如小朋友1.2米以下，係必須由家長陪伴入場，人頭收費玩機動遊戲。
充值 (即會員價$)
RMB 338 (半年期效)
RMB 680 (額外送RMB 238 – 1年期效)
RMB 1580 (額外送RMB 1018 – 2年期效)
最後「龍崗兒童公園」採用咗預約制，雖然當日去到冇需要出示預約證明，但我都建議大家先用微信，去「龍崗兒童公園」度預約再出發。
閱讀更多：
👉🏻【假日好去處】美人魚劇場 | 1萬平米嘅大型水族館 | 海洋X陸地生物
【深圳龍崗兒童公園】
地址：龍崗區鹽龍大道與愛心路交會處北側
公園開放時間：6am-10pm
無動力樂園開放時間：6am-6pm
機動遊戲的開放時間：9am-10pm
交通方法：乘搭地鐵16號到線愉園站C出口仁恆夢中心，步行約12分鐘即可到達。
另外還有其他方法前往樂年廣場、恆明ONE5棟、恆明ONE3棟、星尚匯、龍崗天健雲途。
【和牛b的成長日記】
記得Like我哋Facebook及設定為搶先看，收睇我哋發掘最新、至好玩嘅好去處呀。
https://www.facebook.com/80smami/
http://www.instagram.com/wagyubmami/
https://www.youtube.com/@Wagyubmami/
